ریاض: سعودی عرب کی کنگ عبداللہ بندرگاہ نے گزشتہ برس ریکارڈ بزنس کیا جس کے بعد اسے دنیا کی دوسری سب سے تیزی سے ترقی کرنے والی پورٹ کے طور پر تسلیم کیا گیا ہے۔
اردو نیوز کے مطابق سعودی عرب کی کنگ عبداللہ پورٹ نے 2022 میں کنٹینر تھرو پٹ میں 3.25 فیصد ریکارڈ کیا اور دنیا کی سب سے تیزی سے ترقی کرنے والی پورٹس میں اپنا مقام مضبوط کیا ہے۔
کنگ عبداللہ پورٹ کے سی ای او جے نیو کا کہنا ہے کہ ہمیں فخر ہے کہ بین الاقوامی تجارت کو عالمی اقتصادی بحران سے پیدا ہونے والے چیلنجز کے باوجود پورٹ نے 2022 میں مثبت کارکردگی کا مظاہرہ کیا۔
انہوں نے مزید کہا کہ یہ کامیابی اس کے کاروباری ماڈل، اس کی صنعتی صلاحیتوں، سعودی عرب کے لاجسٹکس اور سمندری شعبوں میں اس کے غیر متنازعہ کردار کی توثیق ہے۔
کنگ عبداللہ پورٹ نے 2022 میں ایک کامیاب سال گزارا ہے جسے اپریل میں الفلینر کی جانب سے دنیا کی دوسری سب سے تیزی سے ترقی کرنے والی پورٹ کے طور پر تسلیم کیا گیا تھا۔
کنگ عبد اللہ پورٹ کو پچھلے چار برسوں میں دو بار اس باوقار درجہ بندی سے نوازا گیا ہے جو اس کے بنیادی ڈھانچے کو مزید ترقی دینے، اس کی پیشکش کی گہرائی اور وسعت کو بہتر بنانے اور اس کے کاموں کو بڑھانے کے لیے مسلسل کوششوں کے عزم کی عکاسی کرتا ہے۔
پورٹ نے اپنے کنٹینر ٹرمینل پر 29 لاکھ 5 ہزار 306 کنٹینرائزڈ کارگو ہینڈل کیے جو 2021 میں 28 لاکھ 13 ہزار 920 ریکارڈ کیے گئے تھے۔
کنگ عبداللہ پورٹ نے ایک اور اہم سنگ میل میں اپنے پہلے ٹرائل کے حصے کے طور پر آسٹریلیا کو 288 ٹرکوں کی ترسیل کی سہولت فراہم کی۔
