ہیملٹن: امریکی ریاست مسیسیپی کے ایک ڈے کیئر سینٹر میں ڈراؤنے ماسک پہن کر بچوں کو ڈرانے والے ملازمین کو گرفتار کر لیا گیا۔
تفصیلات کے مطابق ہیملٹن کے ایک ڈے کیئر سینٹر کے پانچ ملازمین کی رواں ماہ کے شروع میں ایک ویڈیو وائرل ہوئی تھی، جس میں وہ ہالووین کے ماسک پہن کر بچوں کو ڈراتے دکھائی دیتے ہیں۔
انٹرنیٹ پر یہ ویڈیو وائرل ہونے کے بعد خواتین ملازمین کو گرفتار کر لیا گیا، ان پر بچوں کو مجرمانہ طور پر ڈرانے اور ان کے ساتھ بدسلوکی کرنے کا الزام عائد کیا گیا ہے۔
جب بچوں کے والدین نے یہ دیکھا کہ ملازمین ’اسکریم‘ نامی ہارر فلم کے بھوت والا ماسک پہن کر بچوں کو ڈرا رہے ہیں اور بچے ڈر کے مارے چیختے ہوئے بھاگے اور ملازمین نے پھر بھی ان کا پیچھا کیا، تو یہ دیکھ کر وہ شدید صدمے میں گرفتار ہو گئے۔
Four Mississippi day care workers have been fired following viral videos showing one worker scaring children in a Halloween maskhttps://t.co/JUeOPY835U
— philip lewis (@Phil_Lewis_) October 9, 2022
ویڈیو سامنے آتے ہی مسیسیپی کے محکمہ صحت اور منرو کاؤنٹی پولیس نے تحقیقات کا آغاز کیا، بعد ازاں پانچ ملازمین کو حراست میں لیا گیا، جن میں سے چار کو بچوں کے ساتھ بد سلوکی کے تین الزامات کا سامنا ہے، جب کہ ایک کو اس واقعے کی اطلاع دینے میں ناکامی کے الزام کا سامنا ہے۔
یہ فوٹیج 4 اکتوبر کو سامنے آئی، جس میں دکھایا جانے والا واقعہ ہیلمٹن میں واقع ’لل بلیسنگ چائلڈ کیئر‘ نامی سینٹر میں پیش آیا، ویڈیو میں دیکھا جا سکتا ہے کہ ماسک پہنا ملازم ایک بچے کے چہرے پر آ کر چیختا ہے۔
ڈے کیئر کی خاتون مالک کا کہنا تھا کہ ستمبر میں بھی اسی طرح کا ایک واقعہ پیش آیا تھا، لیکن انھیں ان واقعات سے آگاہ نہیں کیا گیا، بلکہ ان کی ویڈیوز سوشل میڈیا پر وائرل کی گئیں۔
