کراچی : سندھ بلڈنگ کنٹرول اتھارٹی کے تین افسران کو بھتہ لینے کے الزام میں گرفتار کرکے پریڈی تھانے میں مقدمہ درج کرلیا گیا ہے۔
تفصیلات کے مطابق سندھ بلڈنگ کنٹرول اتھارٹی کے تین افسران کو بھتہ لینے کے الزام میں گرفتار کرلیا گیا تاہم ایک افسر فرار ہوگیا۔
پولیس نے بتایا کہ گرفتار ملزمان میں ایس بی سی اے کے تین سینئر بلڈنگ انسپکٹر شامل ہیں تاہم ملزمان کے خلاف پریڈی تھانےمیں مقدمہ درج کرلیا گیا ہے۔
مقدمہ میں اے ٹی اے اور بھتہ خوری کی دفعات شامل کی گئی ہیں، ملزمان نے بلڈرسے چالیس لاکھ روپے بھتہ طلب کیا تھا۔
یاد رہے گزشتہ سال سندھ ہائی کورٹ نے کراچی کے نارتھ ناظم آباد بلاک سی میں غیر قانونی تعمیرات سے متعلق کیس میں بلڈر، پلاٹ کے مالک اور سندھ بلڈنگ کنٹرول اتھارٹی کے اہلکاروں کے خلاف ایف آئی آر درج کرنے کا حکم دیا تھا۔
دوران سماعت سربمہر عمارت ڈی سیل کرکے تعمیرات پر عدالت نے سخت برہمی کا اظہار کرتے ہوئے غیر قانونی تعمیرات پر ڈپٹی ڈائریکٹر ایس بی سی اے سینٹرل کو جھاڑ پلادی تھی۔
