پاکستان تحریک انصاف کے مرکزی سینیئر وائس چیئرمین شاہ محمود قریشی نے کہا ہے کہ ہم مذاکرات سے نہیں کتراتے مگر حکومت کی نیت میں فتور ہے۔
اے آر وائی نیوز کے مطابق پاکستان تحریک انصاف کے مرکزی رہنما اور سابق وزیر خارجہ شاہ محمود قریشی پارٹی چیئرمین عمران خان کی پیشی سے قبل اسلام آباد ہائیکورٹ پہنچ گئے ہیں۔ اس موقع پر میڈیا سے گفتگو کرتے ہوئے انہوں نے کہا کہ مذاکرات سے کتراتے نہیں مگر حکومت کی نیت میں خلل ہے۔ ایک طرف مذاکرات تو دوسری طرف ہمارے لوگ گرفتار کیے جا رہے ہیں۔
شاہ محمود قریشی نے مزید کہا کہ الیکشن کے التوا کا جو بہانہ بنایا گیا ہے وہ انتہائی کمزور ہے۔ آئین میں واضح ہے کہ الیکشن کب ہوں گے۔ امید ہے عدلیہ آئین کا تحفظ کرے گی۔
ان کا کہنا تھا کہ ملک میں سیاسی عدم استحکام ہے، ہمارے کارکنان کو پنجاب میں گرفتار کیا گیا، مگر اب خوف کا بت ٹوٹ چکا ہے
پی ٹی آئی رہنما نے کہا کہ سینیٹ میں اسحاق ڈار کے بیان سے ایک ہیجان پیدا ہو گیا ہے۔ انتخابات کے لیے مل بیٹھ کر چل سکتے ہیں۔
