مانسہرہ: بٹل کے مقام پر پل بہنے کے باعث سیاحوں کو مشکلات کا سامنا تھا، اے آر وائی نیوز پر خبر نشر ہونے کے بعد انتظامیہ متحرک ہو گئی۔
تفصیلات کے مطابق شاہراہ کاغان پر بٹل کے مقام پر پل گزشتہ سال سیلابی ریلے میں بہہ گیا تھا جو ایک سال کے بعد بھی تاحال تعمیر نہ ہو سکا ہے۔
تاہم اے آر وائی نیوز پر خبر نشر ہونے کے بعد شاہراہ کاغان پر آمد و رفت محفوظ بنانے کے لیے انتظامیہ اور متعلقہ ادارے موقع پر پہنچے، اور گزرنے کے لیے بنائے گئے متبادل راستے میں بڑے پائپ ڈال دیے، تاکہ پانی ان میں سے گزرے اور سیاحوں کو پریشانی نہ ہو۔
ڈپٹی کمشنر راؤ بلال شاہد نے بتایا کہ برساتی نالے میں پائپ ڈال دیے گئے تاکہ آمد و رفت میں آسانی ہو، ناران بٹل کے مقام پر پل بھی جلد تعمیر کیا جائے گا۔ انتظامیہ کا کہنا تھا کہ بٹل نالے میں پانی زیادہ ہونے کے باعث سیاحوں کو شدید مشکلات تھیں۔
تاہم پل کی تعمیر کا کام تاحال شروع نہیں کیا جا سکا ہے، جس کی وجہ سے سیاحتی سیزن متاثر ہو سکتا ہے، اور سیاحت پر انحصار کرنے والے مقامی لوگوں کو بھی مشکلات کا سامنا ہوگا۔