پانچ سو افراد کو غیر قانونی طور پر یورپ لے جانے والا جہاز بحیرہ روم میں لاپتہ ہوگیا ہے جہاز میں نومولود اور حاملہ خواتین بھی سوار ہیں۔
غیر ملکی میڈیا کے مطابق بحیرہ روم میں ایک جہاز لاپتہ ہوا ہے بتایا جاتا ہے کہ اس جہاز میں 500 مہاجرین سوار تھے جن میں حاملہ خواتین اور نومولود بھی شامل تھے اور انہیں یہ جہاز غیر قانونی طور پر یورپ لے کر جا رہا تھا۔
رپورٹ کے مطابق اس جہاز کا انجن لیبیا سے 320 کلومیٹر کے فاصلے پر جا کر بند ہوگیا اور آخری اطلاع تک یہ جہاز مالٹا سے 400 کلومیٹر کے فاصلے پر سمندر میں سرگرداں تھا۔
اس حوالے سے الارم نام کے امدادی گروہ نے اعلان کیا ہے کہ اس جہاز سے آخری بار بدھ کو رابطہ ہوا تھا۔ جہاز کے مسافروں میں ایک نومولود اور کئی حاملہ خواتین بھی شامل ہیں ۔
رپورٹ میں یہ بھی بتایا گیا ہے کہ جمعرات کو اٹلی کے ساحلی گارڈ فورس نے دو الگ الگ جہازوں سے 400 اور 700 مہاجروں کو بچایا تھا تاہم ان پناہ گزینوں کا مذکورہ گمشدہ جہاز سے کوئی تعلق نہیں ہے۔
اطالوی حکومت کے اعلان کے مطابق رواں سال اب تک 47 ہزار غیرقانونی پناہ گزین سمندر کے راستے اٹلی پہنچے ہیں جن کی تعداد گزشتہ سال کے مقابلے میں 18 ہزار زیادہ بتائی جا رہی ہے۔
قابل ذکر بات یہ ہے کہ مذکورہ پناہ گزین مغربی ممالک کی مداخلت پسندانہ پالیسیوں اور ان کی پیدا کردہ مشکلات اور جنگوں کے نتیجے میں اپنا ملک چھوڑنے پر مجبور ہوتے ہیں تاہم یورپی ممالک ان کے داخلے پر ہزاروں قسم کی پابندیاں اور رکاوٹیں عائد کرکے ان کی زندگی اور بھی اجیرن بنائے ہوئے ہیں۔
