کراچی: صوبہ سندھ کے رواں برس کے بجٹ میں تعلیم کے لیے 34 ارب روپے رکھنے کی تجویز دی گئی ہے، صوبے بھر میں نئے اسکولز قائم کرنے کی بھی تجویز دی گئی ہے۔
تفصیلات کے مطابق صوبہ سندھ کے رواں برس کے بجٹ میں تعلیم کے شعبے سے متعلق محکموں کا ترقیاتی بجٹ 34 ارب روپے رکھنے کی تجویز دی گئی ہے۔
محکمہ اسکول ایجوکیشن کا ترقیاتی بجٹ 16 ارب 50 کروڑ روپے رکھنے کی تجویز دی گئی ہے۔
اسکولوں کی بحالی، نئے اسکول بنانے اور سہولت فراہم کرنے کے لیے 208 نئی اسکیمیں رکھنے کی تجویز دی گئی ہے۔
سندھ کے شہروں لاڑکانہ، خیرپور، سکھر اور نوشہرو فیروز کے اضلاع میں 20 نئے اسکول قائم کرنے کی سفارش دی گئی ہے۔
محکمہ کالج ایجوکیشن سندھ کے نئے مالی سال کے بجٹ میں 6 ارب 57 کروڑ روپے ترقیاتی بجٹ میں رکھنے کی تجویز دی گئی ہے، اسٹیوٹا کے ترقیاتی بجٹ میں 1 ارب 50 کروڑ روپے رکھنے کی تجویز دی گئی ہے۔
سندھ کی جامعات اور بورڈ نے 1 ارب 34 کروڑ روپے کی نئی اسکیمیں رکھنے کی سفارش کی ہے، سندھ کے محکمہ اسکول ایجوکیشن نے رتو ڈیرو میں گرلز کمیونٹی ماڈل اسکول قائم کرنے کی بھی تجویز دی ہے۔
