کراچی / سکھر: سندھ ہائیکورٹ سکھر بینچ نے محکمہ ثقافت سندھ کو لندن، پیرس اور کینیڈا سمیت بیرون ملک، اور آرٹس کونسل کراچی کو سندھ سے باہر ثقافتی پروگرام کرنے سے روک دیا۔
تفصیلات کے مطابق سندھ ہائیکورٹ سکھر بینچ میں دائر ایک درخواست کی سماعت ہوئی، دوران سماعت درخواست گزار کے وکیل ایڈووکیٹ سہیل میمن کا کہنا تھا کہ محکمہ ثقافت سندھ کے بجٹ سے، باہر پروگرامز منعقد کر رہا ہے اسے روکا جائے۔
ایڈووکیٹ سہیل میمن نے کہا کہ سندھ میں ثقافتی ورثہ تباہ ہو رہا ہے اور لائبریریز بند ہو رہی ہیں۔
درخواست کی سماعت جسٹس صلاح الدین پنہور اور جسٹس عبد المبین لاکھو پر مشتمل 2 رکنی بینچ نے کی۔
جسٹس صلاح الدین پنہور نے فیصلہ سناتے ہوئے کہا کہ سندھ کا پیسہ باہر کیوں خرچ کیا جا رہا ہے، اپنے فیصلے میں ہائیکورٹ نے محکمہ ثقافت سندھ کو لندن، پیرس اور کینیڈا سمیت بیرون ملک ثقافتی پروگرامز منعقد کرنے سے روک دیا۔
عدالت نے آرٹس کونسل کراچی کو بھی سندھ سے باہر پروگرام کرنے سے روک دیا۔
