ساہیوال: صوبہ پنجاب کے شہر ساہیوال میں اپنی نوعیت کا انوکھا کھیل منعقد ہوا جس میں شرکا نے ایک دوسرے کو تھپڑ مارے۔
ساہیوال کے نواحی علاقہ سلیمانکی بھینی میں پیر خواجہ منیر احمد چشتی کے سالانہ عرس کے موقع پر کبڈی میچ کے کھلاڑیوں نے ایک دوسرے کو خوب تھپڑ لگائے۔
یہ مار کٹائی تھپڑ کے مقابلے کا حصہ تھی جس میں مدمقابل کو زیادہ تھپڑ لگانے والا فتحیاب ہونے والا تھا۔ کھیل کے دوران ڈھولچی نے ڈھول پر کھلاڑیوں کے خون کو خوب گرمایا۔
ساہیوال اور حویلی لکھا کے درمیان کھیلے جانے والے اس منفرد کبڈی میچ میں حویلی لکھا کی ٹیم نے 45 پوائنٹ حاصل کرکے فاتح پائی۔
ساہیوال نے 37 پوائنٹس حاصل کیے اور یوں کبڈی کا مقابلہ حویلی لکھا کی ٹیم نے 8 پوائنٹ سے جیت لیا۔ جیتنے والی ٹیم کے حامیوں نے ڈھول کی تھاپ پر بھنگڑے ڈالے اور جشن منایا گیا۔ جیتنے والے کھلاڑیوں پر نوٹ بھی نچھاور کیے گئے۔
یاد رہے کہ تھپڑوں کی کبڈی کا شمار پنجاب کے قدیمی کھیلوں میں ہوتا ہے اور عرصہ دراز سے یہ کھیل اس خطے میں کھیلا جارہا ہے۔
رواں سال اپریل میں میاں چنوں کے خانیوال گورنمنٹ ہائی اسکول میں اساتذہ کی جانب سے منعقد کردہ تھپڑوں کی کبڈی کے مقابلے میں چھٹی جماعت کا طالب علم بلا ل اپنے ہی ہم جماعت عامر کے ہاتھوں جاں بحق ہوگیا تھا۔
