لاہور : پنجاب میں اسموگ کے تدارک کیلئے سافٹ لاک ڈاؤن نافذ کردیا گیا ، لاک ڈاؤن کے تحت آج اور کل تعلیمی ادارے بند رہیں گے جبکہ مارکیٹیں سہ پہر 3 بجے کے بعد کھلیں گی۔
تفصیلات کے مطابق پنجاب میں اسموگ نے ایسے ڈیرے ڈال رکھے ہیں کہ شہریوں کی جان نہیں چھوٹ رہی، نگراں صوبائی حکومت لاک ڈاؤن سمیت کئی اقدامات کرچکی ہے لیکن فائدہ نہیں ہورہا۔
پنجاب حکومت نے ایک بار پھر اسموگ کے خاتمے کیلئے سافٹ لاک ڈاؤن لگا دیا ،پی ڈی ایم اے نے اسمارٹ لاک ڈاؤن کا نوٹیفکیشن جاری کر دیا ہے۔
نوٹیفکیشن میں بتایا کہ اسموگ لاک ڈاؤن کا اطلاق لاہور اور گوجرانوالہ ڈویژن سمیت دس اضلاع میں ہوگا۔
لاک ڈاؤن کے تحت دس اضلاع میں آج اورکل تعلیمی ادارے بند رہیں گے جبکہ کاروباری مراکز اور مارکیٹیں سہ پہر تین بجے کے بعد کھلیں گی۔
نگراں وزیراعلیٰ محسن نقوی کا کہنا تھا کہ جمعہ اور ہفتہ کومارکیٹیں تین بجے کے بعد کھولنے کی اجازت ہوگی تاہم اتوار کو مال روڈ صرف سائیکل چلانے والوں کیلئے مختص ہوگی۔
محسن نقوی نے مزید کہا کہ اگر انتیس نومبر کو بادل آئے اور اسموگ کیلئے سازگار ہوئے تو مصنوعی بارش برسانے کی بھی کوشش کی جائے گی۔
دوسری طرف اسموگ کی وجہ سے جی ٹی روڈ پر ٹریفک کی روانی معمول سے کم ہے لیکن شہریوں کی جانب سے سموگ ایس اوپیز پرکوئی عملدآمد نہیں کیا جا رہا۔
