چینی کی قیمت بلند ترین سطح پرپہنچ گئی

پاکستان کے صوبے بلوچستان کے دارالحکومت کوئٹہ میں چینی کی قیمت بلند ترین سطح پرپہنچ گئی۔

تفصیلات کے مطابق ایک طرف بجلی کے بھاری برکم بل تو دوسری جانب مہنگائی کے ستائے عوام کے لیے چینی خریدنا بھی مشکل ہو گیا ہے۔

پٹرول کی قیمتوں میں اضافے کے بعد دیگر اشیا خورد و نوش کی طرح چینی کی قیمتوں کو بھی پر لگ گئے ہیں، آئے روز قیمتوں میں اضافے سے پریشان شہری مایوسی کا شکار ہونے لگے ہیں۔

ذرائع کے مطابق کوئٹہ میں 20 روپے اضافے کیساتھ چینی کی فی کلو قیمت 220 روپے سے زائد ہوگئی جبکہ چینی کی ہول سیل ریٹ 210 روپے ہے، مارکیٹ ذرائع کا کہنا ہے کہ 50 کلو چینی کا تھیلا 10 ہزار 500 کا ہوگیا۔

اس صورت حال میں عوام حکومت سے پٹرول اور بجلی کی قیمتوں میں کمی کا مطالبہ کر رہے ہیں لیکن حکومت ساری ذمہ داری آئی ایم ایف پر ڈال کر ہاتھ پر ہاتھ دھرے بیٹھے نظر آ رہی ہے۔

Comments