کراچی: سندھ حکومت نے کپاس کی امدادی قیمت 10 سے 11 ہزار روپے من مقرر کرنے کا مطالبہ کر دیا ہے۔
صوبائی وزیر زراعت محمد بخش مہر نے وفاق سے کہا ہے کہ وہ کپاس کی امدادی قیمت دس سے گیارہ ہزار روپے من مقرر کرے، کیوں کہ مناسب قیمت نہ ملنے سے کاشت کار کپاس نہیں لگا رہے ہیں۔
انھوں نے کہا رواں سال سندھ میں کپاس کی فصل کا ٹارگٹ 6 لاکھ 40 ہزار ہیکٹرز رکھا گیا، اور اس وقت کپاس کی بوائی 20 فی صد ہو چکی ہے۔
انھوں نے کہا مہنگی کھاد، بیج، پٹرولیم مصنوعات اور زرعی ادویات نے کسانوں کاخرچ بڑھا دیا ہے، کاشت کار کو گزشتہ سیزن میں کپاس کی مناسب قیمت نہیں ملی تھی تو اس بار وہ فصل کیسے تیار کریں گے؟ کسان کو اچھی قیمت ملے گی تو وہ کپاس لگائے گا، کپاس ملکی ٹیکسٹائل صنعت کی ضرورت ہے۔
صوبائی وزیر کا کہنا تھا کہ خریف سیزن میں سندھ کو اپنے حصے کا پورا پانی نہ ملا تو کپاس اور چاول سمیت زرعی اجناس کی فصل کم لگنے کا اندیشہ ہے۔ محمد بخش مہر نے ارسا پر بھی تنقید کی، اور کہا کہ ہم ارسا کے 3 رخی فارمولے کے تحت سندھ کو پانی دینے کا فیصلہ مسترد کرتے ہیں۔
