مغربی کنارے، یروشلم اور اسرائیل میں سوشل میڈیا پر فلسطینوں سے یکجہتی کرنے والوں کی گرفتاریاں جاری ہے، صہیونی دہشت گردی بے نقاب کرنے پر سوشل میڈیا ایکٹویسٹ، ماہرقانون، ڈاکٹر اور کاروباری شخصیات کو دھرلیا گیا۔
تفصیلات کے مطابق صہیونیوں نے فلسطین کے حامیوں کو بھی نشانے پر رکھ لیا اور کہا لڑ نہیں رہے تو کیا ہوا، فلسطین کی حمایت تو کر رہے ہو، ہم تم میں سے کسی کو نہیں چھوڑیں گے۔
الجزیرہ ڈیجیٹل انویسٹی گیشن یونٹ تحقیقات سامنے لے آیا اور سوشل میڈیا پر صہیونی رائٹ ونگ نیٹ ورکس کیا کررہا ہے سب تفصیل بیان کردی۔
الجزیرہ ڈیجیٹل انویسٹی گیشن یونٹ نے بتایا کہ مغربی کنارے، یروشلم اوراسرائیل کے وہ لوگ جو سوشل میڈیا پر فلسطین سے یکجہتی میں آواز اٹھا رہے ہیں، وحشی درندوں کی دہشت گردی بے نقاب کر رہے ہیں، انہیں گرفتار کیا جارہا ہے۔
سات اکتوبر سے اب تک مغربی کنارے، مشرقی یروشلم اور اسرائیل سے فلسطین کے سو سے زائد حامیوں کو گرفتار کیا گیا ہے، ناقدین کا کہنا ہے کہ فلسطین کے حامیوں کی آواز کو دبانے کا یہ منظم مہم ہے، خواہ وہ سوشل میڈیا ایکٹویسٹ ہوں یا ماہر قانون، ڈاکٹر ہوں یا کاروباری شخصیات۔
ناقدین نے مزید بتایا کہ ان کے لائسنس منسوخ کیے جارہے ہیں، ان کی املاک تباہ کی جارہی ہیں اور کاروبار کو برباد کیا جارہا ہے جبکہ ایک فلسطینی گلوکارہ بھی فیس بک پر فلسطین کی حمایت میں پوسٹ کو دہشت گردی قرار دے کر گرفتار کرلیا گیا ہے۔
