نوجوان لڑکوں نے ایک شخص کو چاقو کے پے درپے وار کرکے قتل کردیا جبکہ اسے سڑک پر بھی گھسیٹتے رہے۔
بھارت کے دارلحکومت دہلی میں ایک افسوسناک واقعہ پیش آیا جس میں پانچ نوعمر لڑکوں نے ایک شخص پر چھریوں سے 25 کے قریب وار کرتے ہوئے اسے قتل کردیا۔ پانچوں لڑکے مذکورہ شخص کو اس وقت تک سڑک پر گھسیٹتے رہے جب تک اس کی جان نہ نکل گئی۔
بھارتی میڈیا رپورٹس کے مطابق پولیس نے اس قتل کے سلسلے میں پانچ ملزمان کو حراست میں لیا ہے۔ پولیس ڈپٹی کمشنر ساؤتھ ایسٹ راجیش دیو کا کہنا ہے کہ مقتول گورو پر 25 کے قریب چھریوں کے وار کیے گئے۔
انھوں نے بتایا کہ گوتم پوری کے رہائشی شخص کو رات ڈھائی بجے کے قریب قتل کیا گیا۔ اس دوران پٹرولنگ پر معمور پولیس ٹیم جائے وقوع پر پہنچی۔
پولیس کو دیکھ کر لڑکوں نے وہاں سے فرار ہونے کی کوشش کی، تاہم پولیس نے ان کا پیچھا کرتے ہوئے تین لڑکوں کو پکڑ لیا جبکہ باقی دو لڑکوں کو بھی بعد میں گرفتار کرلیا گیا۔
ڈپٹی کمشنر پولیس کے مطابق دو ہیڈ کانسٹیبل نے ملزمان کو اس شخص پر حملہ کرتے ہوئے دیکھا، جب انھوں نے بھاگنے کی کوشش کی تو دنوں اہلکاروں نے قریب ہی موجود پولیس ٹیم کی مدد سے انھیں گرفتار کرلیا۔
اب تک گورو کے قتل کی وجوہات سامنے نہیں آسکیں، مقتول کی لاش کو پورسٹ مارٹم کے لیے آل انڈین انسٹیٹیوٹ آف میڈیکل سائنسز بھیج دیا گیا ہے۔
