کراچی: پاک فوج کے تعاون سے پہلی تھر آف روڈ بائیک ریلی یکم سے پانچ فروری تک منعقد کی جائے گی۔
تفصیلات کے مطابق تھر آف روڈ بائیک ریلی میں بائیکرز کراچی سے تھر تک کا طویل سفر طے کریں گے، اس میگا ایونٹ کا مقصد صوبہ سندھ میں سیاحت کو فروغ دینا ہے۔
تھر آف روڈ بائیک ریلی کے انعقاد کے حوالے سے ہونے والی پریس کانفرنس میں نگراں صوبائی وزیر برائے سیاحت ارشد ولی محمد کا کہنا تھا کہ پہلی بار صوبہ سندھ میں بائیک ریلی کا انعقاد کیا جا رہا ہے، یہ بائیک ریلی محکمہ سیاحت اور پاک فوج کے تعاون سے منعقد کی جا رہی ہے۔
انھوں نے کہا ریلی میں تین ایونٹس ہوں گے، پہلی کلاس میں ہارلے ڈیوڈسن بائیکس کا گروپ حصہ لے گا، بقیہ دو گروپس میں مختلف پاور کی سی سی بائیکس کو رکھا گیا ہے۔
ریلی کے لیے 55 کلومیٹر کا ٹریک تیار کیا گیا ہے، فاتح بائیکر کو ایک لاکھ 75 ہزار روپے کا انعام دیا جائے گا، صوبائی وزیر نے بتایا کہ اس وقت سندھ میں 200 سے زائد سیاحت کے مقامات ہیں، جن کو فروغ دینے کے لیے ہم کام کر رہے ہیں۔
انھوں نے کہا پورے پاکستان کو دعوت دے رہے ہیں کہ وہ آئیں اور ہمارے ساتھ مل کر کام کریں، سندھ میں سیاح بے خوف آ سکتے ہیں، نگراں وزیر کا یہ بھی کہنا تھا کہ یوٹیوبرز اور وی لاگرز پاکستانی تہذیب و ثقافت میں بھی کافی دل چسپی رکھتے ہیں، یہ ان کے لیے بھی اچھا موقع ہے۔
