شانگلہ : این اے گیارہ میں مبینہ دھاندلی کے خلاف پی ٹی آئی کارکنوں کے احتجاج کے دوران پولیس اور مظاہرین کی جھڑپوں میں تین افراد کی جان چلی گئی۔
تفصیلات کے مطابق شانگلہ کے حلقے این اے گیارہ میں مبینہ دھاندلی کیخلاف احتجاج کے دوران مشتعل مظاہرین نے ایڈیشنل ریٹرننگ آفیسر کی گاڑی جلادی۔
پولیس اور مظاہرین کی جھڑپوں میں تین جاں بحق اور دو پولیس اہلکاروں سمیت چار افراد زخمی ہوگئے۔
مظاہرین کو منتشر کرنے کے لیے پولیس کی جانب سے شیلنگ اور ہوائی فائرنگ کی گئی تو سیاسی جماعت کے کارکنوں نے پتھراؤکیا۔
دوسری جانب انتخابات کےنتائج میں مبینہ دھاندلی کیخلاف گجرات حیدرآباد اورکراچی میں احتجاج کیا گیا، گجرات کچہری چوک میں انتخابی نتیجے میں مبینہ دھاندلی کیخلاف پرویزالہی کی اہلیہ قیصرہ الٰہی اور سمیراالہیٰ نے کارکنوں سمیت دھرنا دیا، جس میں نامعلوم افراد کی فائرنگ سے ایک کارکن زخمی ہوگیا۔
حیدرآباد میں ڈی آر او آفس پر دو سیاسی جماعتوں کے کارکنوں کے درمیان جھگڑے ، گرماگرمی اورتلخ کلامی کے بعد گولیاں چل گئیں، فائرنگ سےدو افرادزخمی ہوئے۔
