کراچی: تحریک لبیک پاکستان (ٹی ایل پی) کے سربراہ سعد رضوی نے مہنگائی کیخلاف ہڑتال کے بعد آئندہ کے لائحہ عمل کا اعلان کردیا۔
اے آر وائی نیوز کے مطابق ٹی ایل پی سربراہ سعد رضوی کا کہنا ہے کہ تین مارچ بعد نماز جمعہ ملک بھر کے پریس کلب پر مظاہرے کیے جائیں گے پوری قوم سے مظاہروں میں شرکت کی اپیل ہے۔
انہوں نے کہا کہ پیٹرولیم مصنوعات کی قیمتوں میں حکومت سے ضرور کمی کروائیں گے۔
واضح رہے کہ مہنگائی کے خلاف ٹی ایل پی کی ہڑتال کے باعث کئی شہروں میں کاروبار جزوی طور پر بند رہا تھا جبکہ ٹریفک بھی معمول سے کم تھیں۔
کراچی کے تاجررہنماؤں نے ہڑتال سے لاتعلقی کا اعلان کیا تھا جبکہ شہر کے تمام پیٹرول پمپس بھی کھلیں رہے تاہم مضافاتی علاقوں میں جزوی ہڑتال رہی تھی۔
ادھر حیدرآباد میں ہڑتال کے باعث صبح کے اوقات میں بازار اور دکانیں اور بیشتر پٹرول پمپس بھی بند رہے، جس سے شہریوں کو مشکلات کا سامنا تھا۔
لاہور میں ٹی ایل پی کی جانب سے مہنگائی کے پیش نظر ہڑتال کی کال پر شہر بھر میں مارکیٹیں جزوی طور پر بند تھیں۔
یاد رہے کہ چند روز قبل حکومت کی جانب سے پیٹرول کی قیمت میں 22 روپے کا اضافہ کیا تھا۔