دورہ آسٹریلیا میں پاکستان اور پرائم منسٹر الیون کے مابین کل سے شروع ہونے والے واحد چار روزہ میچ کی ٹرافی کی تقریب رونمائی کینبرا میں ہوئی۔
اے آر وائی نیوز کے مطابق پاکستان کرکٹ ٹیم اپنے دورہ آسٹریلیا کا آغاز کل کینبرا میں پرائم منسٹر الیون کے خلاف واحد چار روزہ پریکٹس میچ سے کرے گی جس کی ٹرافی کی تقریب رونمائی ہوئی۔
مانوکا اوول میں پاکستان ٹیسٹ ٹیم کے کپتان شان مسعود نے پی ایم الیون کے کپتان نیتھن میک سوینی نے مشترکہ طور پر ٹرافی کی رونمائی کی۔
اس موقع پر دونوں کپتانوں نے ٹرافی کے ہمراہ تصاویر بنوائیں اور مشترکہ پریس کانفرنس بھی کی۔
واضح رہے کہ پاکستان ٹیم تین ٹیسٹ میچوں کی سیریز کھیلنے کے لیے گزشتہ ہفتے آسٹریلیا پہنچی تھی۔ سیریز کا با قاعدہ آغاز 14 دسمبر کو پرتھ میں ویسٹ ٹیسٹ سے ہوگا۔ یہ سیریز ٹیسٹ چیمپئن شپ کا حصہ ہے۔
قومی ٹیم نے آسٹریلوی کنڈیشنز سے خود کو ہم آہنگ کرنے کے لیے گزشتہ دو روز کے دوران بھرپور پریکٹس کی۔ بیٹنگ، بولنگ کے ساتھ فیلڈنگ کے طویل سیشن اور فزیکل ٹریننگ بھی کی۔
