سعودی وزارت سیاحت نے خلیج تعاون کونسل (جی سی سی) میں مقیم کارآمد اقامہ ہولڈر تمام غیرملکیوں کے لیے سیاحتی ویزے کے اجرا کا اعلان کیا ہے۔
سبق نیوز کے مطابق خلیج تعاون کونسل کے ممالک میں اقامہ پر مقیم غیرملکی خواہ انکا پیشہ کوئی بھی ہو وہ سیاحتی ویزے پرمملکت آنے کے اہل ہوں گے، اس کے علاوہ سیاحتی ویزے پرآنے والے مسلمان سیاحوں کوعمرہ ادائیگی کی بھی اجازت ہو گی۔
اس سے قبل سعودی وزارت سیاحت نے اس حوالے سے کہا تھا کہ مملکت کے سیاحتی ویزے کا دائرہ وسیع کرنے کے لیے حکمت عملی مرتب کی جارہی ہے جس کا اعلان جلد کیا جائے گا۔ سیاحتی ویزے کے حوالے سے قواعد کی منظوری وزیرسیاحت احمد بن عقیل الخیطب نے جاری کی ہے۔
وزارت نے اس حوالے سے مزید کہا ہے کہ خلیج تعاون کونسل میں شامل ممالک میں رہنے والے سعودی عرب کا وزٹ ویزہ حاصل کرنے کےلیے وزارت کے پورٹل ’روح السعودیہ‘ کے ذریعے اپلائی کرسکتے ہیں۔
وزارت کی جانب سے سیاحتی ویزے کے حوالے سے جاری شرائط میں مزید کہا گیا ہے کہ سیاحتی ویزے کے لیے لازمی ہے کہ جی سی سی میں مقیم درخواست گزار غیرملکی کا اقامہ کم ازکم 3 ماہ کےلیے کارآمد ہو۔
سیاحتی ویزے مرکزی درخواست دہندہ کے ساتھ آنے والے اول درجے کے رشتہ دار اورکفیلوں کے ہمراہ آنے والے ملازمین کے لیے جاری کرایا جاسکتا ہے۔
سیاحتی ویزے پرآنے والوں کےلیے مقررہ قواعد میں کہا گیا ہے کہ مملکت میں سیاحتی ویزے پرآنے والے مقامی قوانین کا احترام کریں اس حوالے سے ان کےلیے لازم ہوگا کہ وہ اپنے ہمراہ شناختی دستاویز اپنے ہمراہ رکھیں۔
سیاحتی ویزے پرآنے والوں کو حج ادا کرنے کی اجازت نہیں ہوگی نہ ہی وہ افراد حج سیزن کے دوران عمرہ کی ادائیگی کےلیے مکہ مکرمہ جاسکیں گے۔
