کرکٹ کی دو سپر پاورز اور روایتی حریف پاکستان اور بھارت ایک سال میں چوتھی بار آج آپس میں ٹکرائیں گی۔
اے آر وائی نیوز کے مطابق کرکٹ کی دو سپر پاورز اور روایتی حریف پاکستان اور بھارت ایک سال میں چوتھی بار آج آپس میں ٹکرائیں گی اور ٹی ٹوئنٹی ورلڈ کپ کے سپر 12 مرحلے میں میلبرن کرکٹ گراؤنڈ میں ایک دوسرے کے مدمقابل آئیں گے۔
اس سے قبل گزشتہ 12 ماہ کے دوران دونوں ٹیمیں تین بار مدمقابل آچکی ہیں جس میں پاکستان کا پلڑا بھاری ہے، قومی ٹیم نے دو میچوں میں بھارت کو شکست کا مزا چکھایا جب کہ بھارتی ٹیم کے ہاتھ صرف ایک فتح ہی آ پائی۔
گزشتہ سال 24 اکتوبر پاکستان کرکٹ کے لیے ایک تاریخی دن تھا جب کہ ٹی ٹوئنٹی ورلڈ کپ میں پاکستان نے دس وکٹوں کی شاندار فتح کے ساتھ عالمی کپ میں بھارت کے پاکستان سے ناقابل شکست رہنے کا ریکارڈ چکنا چور کردیا۔
گزشتہ ماہ ایشیا کپ میں پاک بھارت ٹیمیں دو بار ایک دوسرے کے آمنے سامنے آئیں پہلے میچ میں کم اسکور کے باوجود شاہینوں نے میچ کو سنسنی خیز بنا دیا اور بھارت نے آخری اوور میں کامیابی حاصل کی۔
ایشیا کپ کے سپر فور مرحلے میں پاکستان نے بھارت کا غرور خاک میں ملا دیا اور 181 رنز کا ہدف حاصل کرکے بھارتی سورماؤں کو ڈھیر کردیا۔
ایک سال میں دو میچز جیت کر قومی ٹیم کا حوصلہ بلند ہے اور وہ آج جیت کا عزم لے کر میدان میں اترے گی جب کہ بھارت بھی حساب چکتا کرنے کیلیے خوب جتن کرے گا۔
