اسلام آباد : سپریم کورٹ میں فوجی عدالتوں میں سویلین کے ٹرائل کیخلاف انٹراکورٹ اپیلوں کی سماعت آج ہوگی۔
تفصیلات کے مطابق فوجی عدالتوں میں سویلین کےٹرائل کیخلاف انٹراکورٹ اپیلوں کی سماعت آج ہوگی ، سپریم کورٹ میں آج دن 11بجے سماعت شروع ہوگی۔
جسٹس امین الدین خان کی سربراہی میں 6 رکنی لارجر بینچ سماعت کرے گا ، جسٹس محمد علی مظہر،جسٹس حسن اظہر رضوی، جسٹس شاہدوحید بینچ میں شامل ہیں جبکہ جسٹس مسرت ہلالی اور جسٹس عرفان سعادت خان بھی بینچ میں کا حصہ ہیں۔
سابق چیف جسٹس جواد ایس خواجہ،اعتزازاحسن سمیت دیگر نے سپریم کورٹ سےرجوع کیا تھا۔
جسٹس (ر) جواد ایس خواجہ نے اپیلوں کی جلد سماعت اور 9 رکنی لارجر بینچ تشکیل دینے کی استدعا کر رکھی ہے، ان کی جانب سے دائر درخواست میں موقف اپنایا گیا تھا کہ 6 رکنی بینچ نے فریقین کو نوٹس دیئے بغیر ملزموں کا ٹرائل جاری رکھنے کا حکم دیا۔
درخواست میں کہا گیا کہ میڈیا رپورٹس سے معلوم ہوا کہ 6 رکنی بینچ ٹوٹ چکا، فوجی عدالتوں میں ٹرائل مکمل ہو چکا، بری ہونے والے کسی ملزم کو رہا نہیں کیا گیا، سپریم کورٹ نے ملزموں کی رہائی سے نہیں روکا تھا لہٰذا فوجی عدالتوں سے متعلق اپیلوں کو آئندہ ہفتے سماعت کیلئے مقرر کیا جائے۔
یاد رہے اکتوبر 2023میں 5رکنی بینچ نے 9 مئی واقعات کے 103 ملزمان کا فوجی عدالتوں میں ٹرائل خلاف آئین قرار دیا جبکہ وفاقی حکومت سمیت دیگر کی اپیلوں پر 6 رکنی بینچ نے 13 دسمبر 2023 کو فیصلہ پانچ ایک سے معطل کیا تھا۔
