ٹیکنالوجی کمپنی ٹیسلا کے چیف ایگزیکٹو ایلون مسک نے ٹوئٹر کی ملکیت حاصل کرنے کے بعد اپنا وعدہ پورا کرتے ہوئے دو فیچرز متعارف کروادیے۔
ٹوئٹر کی جانب سے ’ویو کاؤنٹ‘ اور ایک گھنٹے تک ویڈیو اپ لوڈ کرنے کا فیچر متعارف کروایا گیا ہے تاہم ویڈیو اپ لوڈ فیچر بلیو ٹک صارفین کے لیے متعارف کروایا گیا ہے۔
ٹوئٹر بلیو ٹک صارفین 2 جی بی تک کی ویڈیو فائل پوسٹ کرسکیں گے جس کا دورانیہ ایک گھنٹے پر مشتمل ہو۔
کمپنی کا کہنا ہے کہ ’ویڈیو فیچر متعارف کروانے کا مقصد یہ ہے کہ ہمارے صارفین کو ویڈیو کے لیے بہترین معیار فراہم کیا جائے۔
واضح رہے کہ اس سے قبل ٹوئٹر بلیو سبسکرپشن کے صارفین 10 منٹ طویل ویڈیو ہی اپ لوڈ کرسکتے تھے، علاوہ ازیں ٹوئٹر نے بلیو فار بزنس پروگرام بھی متعارف کروایا ہے جو صرف کمپنیوں کے لیے ہوگا۔
ٹوئٹر ویو کاؤنٹ فیچر
ویو کاؤنٹ فیچر تاحال کچھ اکاؤنٹس کو دستیاب ہے جس کی مدد سے صارفین یہ جان سکیں گے کہ ان کے ٹوئٹ کو کتنی بار دیکھا گیا ہے، یہ فیچر ایلون مسک نے گزشتہ ہفتے متعارف کروانے کا اعلان کیا تھا۔
Tweets will show view count in a few weeks, just like videos do. Twitter is much more alive than people think.
— Elon Musk (@elonmusk) December 9, 2022
اس سے قبل صارفین پہلے ٹوئٹر اینالیٹکس کے ذریعے یہ دیکھ سکتے تھے کہ ان کی پوسٹ کو کتنی بار دیکھا گیا ہے لیکن اب اس نئے فیچر سے اینالیکٹس کی ضرورت نہیں ہوگی صارفین پوسٹ پر ہی چیک کرسکیں گے کہ ان کی ٹوئٹس کو کتنی بار دیکھا گیا ہے۔
یاد رہے کہ کمپنی کی جانب سے ٹوئٹر ویریفائیڈ ویب صارفین سے 8 ڈالرز ماہانہ فیس وصول کی جارہی ہے جبکہ آئی ایس او ایس صارفین کے لیے فیس 11 ڈالرز ہے۔
