اترپردیش میں ایک اور مسلم مخالف اقدام سامنے آئے ہیں، پی جے پی کی حکومت نے ’’حلال‘‘ ٹیگ والی کھانے کی مصنوعات پر پابندی لگا دی۔
این ڈی ٹی وی کی رپورٹ کے مطابق فوڈ کمشنر کے دفتر نے ایک حکم نامے میں کہا کہ مصنوعات کی تیاری، ذخیرہ، تقسیم اور فروخت کرنے پر فوری طور پر پابندی عائد کردی گئی ہے۔
رپورٹ میں بتایا گیا کہ ریاستی حکام نے یہ اقدام جعلی حلال سرٹیفکیٹ فراہم کرکے فروخت بڑھانے اور مذہبی جذبات کا استحصال کرنے کے الزام پر مقدمہ درج ہونے کے بعد اٹھایا ہے۔
مقدمہ حلال انڈیا پرائیویٹ لمیٹڈ چنئی، جمعیت علمائے ہند حلال ٹرسٹ دہلی، حلال کونسل آف انڈیا ممبئی، جمعیت علمائے مہاراشٹرا جیسےاداروں کیخلاف درج کیا گیا۔
دوسری جانب جمعیت علما ہند حلال ٹرسٹ نے ایک بیان میں ان الزامات کو بے بنیاد قرار دیا اور کہا کہ وہ اس طرح کی غلط معلومات کا مقابلہ کرنے کے لیے ضروری قانونی اقدامات کرے گی۔
رپورٹ میں کہا گیا جعلی حلال سرٹیفیکیشن مبینہ طور پر کاسمیٹکس، ٹوتھ پیسٹ، تیل اور صابن سے لے کر مختلف قسم کی مصنوعات فروخت کرنے کے لیے استعمال کیے جا رہے تھے۔
