واشنگٹن: امریکی محکمہ خارجہ کے کونسلر ڈیرک شولے کا کہنا ہے کہ پاکستان اور امریکا کے مشترکہ مفادات ہیں ، چاہتے ہیں پاکستان بتائے دہشت گردی کے خلاف کیا مدد درکار ہے۔
تفصیلات کے مطابق امریکی محکمہ خارجہ کے کونسلر ڈیرک شولے رواں ہفتے پاکستان کا اہم دورہ کریں گے۔
دورہ پاکستان سے قبل ڈیرک شولے نے اے آر وائی نیوز سے خصوصی گفتگو میں بتایا کہ پاکستان میں اہم ملاقاتیں ہوں گی، پاکستان اور امریکا کے مشترکہ مفادات ہیں۔
امریکی محکمہ خارجہ کے کونسلر کا کہنا تھا کہ تعلقات کو مزید بہتر کرنے کا بہترین موقع موجود ہے، یقینی بنانا چاہتے ہیں کہ دونوں ممالک زیادہ روابط رکھیں۔
انھوں نے کہا کہ دونوں ملکوں کے لوگوں کی خوشحالی اور حفاظت چاہتے ہیں، پاکستان کی جمہوریت کو بھی مضبوط دیکھنا چاہتے ہیں اور پاکستان کے ساتھ مل کر چیلنجز سے نمٹنا چاہتے ہیں۔
ڈیرک شولے کا کہنا تھا کہ دہشت گردی کے خطرات سے نمٹنے کیلئے مل کر کام کر رہے ہیں، پاکستان میں دہشت گردی کے واقعات پر شدید تشویش ہے،افسوس ہے کہ پاکستان میں دہشت گردی میں اضافہ ہورہا ہے۔
امریکی محکمہ خارجہ کے کونسلر نے بتایا کہ آئندہ ماہ انسداد دہشت گردی پر پاک امریکا مذاکرات ہونے ہیں، چاہتے ہیں پاکستان بتائے دہشت گردی کے خلاف کیا مدد درکار ہے۔
ان کا کہنا تھا کہ تحریک طالبان پاکستان کیلئے بڑا خطرہ ہے، کسی بھی دہشت گرد گروہ کیخلاف مشترکہ کوششوں کیلئے تیار ہیں۔
پاک بھارت تعلقات کے حوالے سے سوال پر ڈیرک شولے نے کہا کہ امریکا کے پاکستان اور بھارت سے اہم تعلقات ہیں، پاکستان اور بھارت میں ثالثی امریکا کا کام نہیں، ہم چاہتے ہیں کہ پاکستان اور بھارت میں معاملات پر سکون رہیں۔
میڈیا کی آزادی سے متعلق امریکی محکمہ خارجہ کے کونسلر کا کہنا تھا کہ پاکستانی قیادت سے ملاقاتوں میں میڈیا کی آزادی پر بھی بات ہوگی، آزاد میڈیا کسی بھی جمہوریت کیلئے اہم ہے۔
انھوں نے مزید کہا کہ ہمارا موقف ہے کہ ذمہ دار لوگوں سے سخت سوالات پوچھنا اہم ہے، سیلاب متاثرین کیلئے امریکا 200 ملین ڈالر سے زائد امداد فراہم کر چکا ہے۔
