واشنگٹن: امریکا میں سابق صدر ڈونلڈ ٹرمپ کا ایک اور فیصلہ واپس لے لیا گیا، امریکا ممکنہ طور پر اقوام متحدہ کے ادارے یونیسکو کا دوبارہ حصہ بننے جارہا ہے۔
امریکا ممکنہ طور پر اقوام متحدہ کی تعلیمی، سائنسی اور ثقافتی تنظیم، یونیسکو میں واپس شامل ہونے کا اعلان کرنے جارہا ہے جسے اس نے 5 سال پہلے چھوڑ دیا تھا۔
سابق صدر ڈونلڈ ٹرمپ نے 2017 میں امریکا کو اقوام متحدہ کے ثقافتی ادارے سے اس بنیاد پر نکالنے کا فیصلہ کیا کہ وہ اسرائیل کے خلاف متعصبانہ رویہ رکھتا ہے۔
ٹرمپ انتظامیہ نے اس وقت اپنا اسرائیل نواز مؤقف واضح طور پر ظاہر کیا، اور 2018 میں باضابطہ طور پر دستبردار ہوگیا۔
امریکی محکمہ خارجہ کے ایک ترجمان کا کہنا ہے کہ اس نے پہلے ہی 8 جون کو یونیسکو کو ایک خط روانہ کر دیا ہے جس میں دوبارہ شمولیت کے منصوبے کی اطلاع دی گئی ہے۔
امریکی صدر جو بائیڈن کی حکومت، بین الاقوامی تعاون کو ترجیح دیتے ہوئے، پہلے ہی ایسے متعدد اداروں میں دوبارہ شامل ہو چکی ہے جن سے امریکا، ٹرمپ انتظامیہ کے دور میں دستبردار ہو گیا تھا۔
