بھارت سے تعلق رکھنے والے 15 سالہ لڑکے نے تاش کے پتوں سے کولکتہ کی بلڈنگز کی نقل تیار کرکے گنیز ورلڈ ریکارڈ میں اپنا نام درج کروالیا۔
رپورٹس کے مطابق 15 سالہ نوجوان نے 41 دن کی محنت سے تاش کے پتوں سے اپنے آبائی شہر کولکتہ کی چار عمارتوں کی نقل تیار کرکے ورلڈ ریکارڈ قائم کیا۔ سوشل میڈیا پر مذکورہ اسٹرکچر کی ویڈیو وائرل ہورہی ہے۔
ارنوو ڈاگا نامی نوجوان کا تیار کردہ پروجیکٹ 40 فٹ لمبا، 11 فٹ، 4 انچ اونچا اور 16 فٹ، 8 انچ چوڑا ہے، اس عمارت نے تاش کے پتوں سے بنائے گئے سب سے بڑے اسٹرکچر کا سابقہ عالمی ریکارڈ توڑ دیا ہے۔
اس سے قبل بائرن برگ نامی شخص نےیہ ریکارڈ قائم کیا تھا، جس نے تاش کے پتوں کے ذریعے مکاؤ کے تین ہوٹلوں کا اسٹرکچر تیار کیا تھا جو کہ 34 فٹ، 1 انچ لمبا، 9 فٹ، 5 انچ اونچا اور 11 فٹ، 7 انچ چوڑا تھا۔
اس حوالے سے ڈاگا کا کہنا تھا کہ کولکتہ کی چار عمارتوں کی نقلیں بنانے کے لیے تقریباً 143,000 کارڈز استعمال کیے گئے ہیں۔
نوجوان کے مطابق اس ںے 41 دن میں یہ اسٹرکچر تیار کیا ہے تاہم ایک عمارت بنانے کے دوران تاش کے پتے گرگئے تھے جس کی وجہ سے تھوڑی تاخیر ہوئی۔
گنیز ورلڈ ریکارڈز سے گفتگو کرتے ہوئے نوجوان کا کہنا تھا کہ کام کے اتنے گھنٹے اور دن ضائع ہونا مایوس کن تھا اور مجھے یہ سب دوبارہ کرنا پڑا، لیکن میرے لیے اس کام سے پیچھے ہٹنا ممکن نہیں تھا۔
