لاہور : صدر واپڈا ایمپلائز یونین نے ملازمین کو مفت بجلی کی سہولت بند کرنے پر سخت ردعمل کی دھمکی دے دی اور کہا بلزمیں موجود درجہ بندی ختم کی جائے۔
تفصیلات کے مطابق پاکستان واپڈا ایمپلائز یونین نے مفت بجلی سہولت کے حق میں مظاہرہ کیا، صدر واپڈا ایمپلائز یونین نے کہا کہ واپڈا ملازمین کو ملنے والی مفت بجلی بند کی تو سخت ردعمل آئے گا۔
مظاہرین کا کہنا تھا کہ عوام کو سستی بجلی فراہم کرنے کیلئے بلزمیں موجود درجہ بندی ختم کی جائے اور سیاسی مداخلت،بجلی کے بلوں میں موجود تمام ٹیکسز ختم کئے جائیں۔
خیال رہے بجلی کے مہنگے بلوں کیخلاف کراچی سے خیبر تک ملک گیر احتجاج جاری ہے ، عوام حکومت سے مطالبہ کر رہی ہیں کہ وہ افسران کی مفت بجلی کی فراہمی کو ختم کرے اور انہیں ریلیف فراہم کرے کیونکہ جو بل وصول کر رہے ہیں وہ ان کی تنخواہوں سے زیادہ ہیں۔
قبل ازیں بدھ کو نگراں وزیر خزانہ شمشاد اختر نے کہا تھا کہ حکومت آئی ایم ایف کے پروگرام میں رہتے ہوئے بجلی کے بلوں پر مزید سبسڈی نہیں دے سکتی۔
