جس عمر میں بچے اپنے کیریئر کے بارے میں سوچنا شروع کر تے ہیں، اسی عمر میں اداکارہ سونالی کلکرنی نے فلموں میں کام کرنا شروع کر دیا تھا، ان کی کارکردگی کا آج بھی چرچا ہے جبکہ انہوں نے کئی شعبوں میں اپنی پہچان بنائی ہے۔
سونالی کلکرنی نے بالی ووڈ میں امول پالیکر کی فلم ’دائرہ‘ سے ہندی فلموں ڈیبیو کیا تھا اور اس فلم سے انہیں پہچان ملی تھی سونالی اب تک ہندی، انگریزی، مراٹھی، گجراتی، کنڑ اور تامل فلموں میں کام کر چکی ہیں۔
اداکارہ کا خیال ہے کہ زبان سے کوئی فرق نہیں پڑتا، فلم میں اصل کھیل کردار کا ہوتا ہے۔ سونالی نے اطالوی فلم میں بھی کام کیا ہے۔ انہیں 2006 میں میلان انٹرنیشنل فلم فیسٹیول میں اطالوی فلم ’فوکو سو دی می‘ کے لیے ایوارڈ بھی ملا۔
بھارتی میڈیا کے مطابق سونالی کلکرنی کا آنجہانی اداکارہ سری دیوی کے ساتھ ایک بار جھگڑا ہوا تھا، دراصل جس سال سری دیوی کی فلم ’انگلش ونگلش‘ ریلیز ہوئی تھی، اسی سال سونالی کی گجراتی فلم ’دی گڈ روڈ‘ بھی آئی تھی۔
سونالی کی فلم ’دی گڈ روڈ‘ کو آسکرز میں بطور بھارتی فلم منتخب کیا گیا تھا جب کہ ’انگلش ونگلش‘ بھی اس دوڑ میں شامل تھی۔
اس پر سری دیوی نے کہا تھا کہ اس نے ’دی گڈ روڈ‘ کے بارے میں، میں نے کبھی نہیں سنا، یہ فلم آسکر میں کیسے جا سکتی ہے؟ اس پر اداکارہ سونالی کو غصہ آگیا تھا۔
انہوں نے کہا تھا کہ صرف ہندی فلمیں اچھی نہیں ہوتیں، اچھی فلمیں ہر زبان میں بنتی ہیں اور جو فلم بہترین ہو اسے آسکر میں ہندوستان کی نمائندگی کرنی چاہیے۔
واضح رہے کہ ایک بار سونالی تنازع میں بھی پھنس چکی ہیں۔ دراصل انہوں نے اپنے ایک بیان میں خواتین کو کاہل کہا تھا۔ انہوں نے کہا تھا کہ آج کل اکثر لڑکیاں کاہل ہو گئی ہیں۔ وہ ایک ایسا ساتھی چاہتی ہیں جس کے پاس پیسہ ہو، لیکن وہ خود کام نہیں کرنا چاہتی۔
اس بیان پر تنازع اتنا بڑھ گیا کہ انہیں معافی مانگنی پڑی، انہوں نے کہا تھا کہ ایک خاتون ہونے کے ناطے ان کا مقصد دوسری خواتین کو تکلیف پہنچانا نہیں تھا۔
