عالمی کپ کا میلہ آسٹریلیا کی چھٹی بار جیت کے ساتھ اختتام پذیر ہوگیا، تاہم اس ایونٹ میں کس ٹیم کی فیلڈنگ سب سے اچھی رہی آئی سی سی نے اعداد و شمار جاری کردیے۔
اس ایونٹ میں یوں تو اکثر ٹیموں نے فیلڈنگ میں جان لڑانے کی کوشش کی لیکن جس ٹیم کی فیلڈنگ آئی سی سی ورلڈکپ 2023 میں سب سے شاندار رہی وہ کوئی اور نہیں بلکہ عالمی کپ کا فاتح آسٹریلیا ہی ہے۔
انٹرنیشنل کرکٹ کونسل کے جاری کردہ اعداد و شمار کے مطابق آسٹریلین ٹیم کے فیلڈنگ امپکیٹ ریٹنگ پوائنٹس 383.58 ہیں جو کہ سب سے زیادہ ہیں۔ اس سے اندازہ ہوتا ہے کہ ورلڈکپ جیتنے میں کینگروز کی فیلڈنگ کا بھی اہم کردار رہا۔
دوسرے نمبر پر بہتر فیلڈنگ کرنے والی جنوبی افریقہ کی ٹیم رہی جس نے 340.59 فیلڈنگ امپکیٹ ریٹنگ پوائنٹس حاصل کیے۔ حیران کن طور پر نیدر لینڈز کی نوآموز ٹیم تیسرے نمبر پررہی جس کے پوائنٹس 292.02 ہیں۔
فائنل میں شکست کا منہ دیکھنے والا بھارت چوتھے نمبر پر رہا جس نے فیلڈنگ میں 281.04 پوائنٹس حاصل کیے جبکہ لسٹ میں پاکستان کا نمبر ساتواں ہے جس نے فیلڈنگ میں محض 212.61 ریٹنگ پوائنٹس حاصل کیے۔
ایونٹ میں سب سے خراب فیلڈنگ افغانستان کی ٹیم نے کی جس کے پلیئرز نے میدان میں کئی کیچز چھوڑے، ان کے ریٹنگ پوائنٹس سب سے کم 123.12 رہے۔
