آئی فون کے دیوانے ایک یوٹیوبر نے دنیا کا سب سے بڑا آئی فون بنا لیا ہے، جو مکمل طور پر فنکشنل ہے، یعنی کسی بھی آئی فون کی طرح کام کر رہا ہے۔
تفصیلات کے مطابق میتھیو بیم نامی ایک یوٹیوبر نے انوکھا کارنامہ انجام دے دیا ہے، اس نے آئی فون 14 Pro Max کا ایک 8 فٹ لمبا ماڈل بنا لیا ہے، جو مکمل طور پر فعال ہے اور اس میں آئی فون کی تمام خصوصیات ویسے ہی موجود ہیں، اور دل چسپ بات یہ ہے کہ اس سے تصاویر بھی لی جا سکتی ہیں۔
میتھیو بیم نے آئی فون بنانے کے پورے عمل کو ریکارڈ بھی کیا ہے، کام مکمل ہونے کے بعد انھوں نے اسے اپنے یوٹیوب چینل پر پوسٹ کر دیا، ویڈیو پوسٹ کرتے ہوئے انھوں نے لکھا ’’میں نے دنیا کا سب سے بڑا آئی فون بنا لیا ہے۔‘‘
بیم نے اتنے بڑے آئی فون کا ڈسپلے بنانے کے لیے ٹچ والے ٹی وی اسکرینوں سے کام لیا، جو میک منی سے منسلک ہے، اس میں والیوم اور موسیقی کے بٹن بھی ہیں۔ یہ دیوہیکل آئی فون تصویریں بھی لے سکتا ہے اور اس پر الارم بھی لگایا جا سکتا ہے اور بھی کئی دوسری چیزیں اس موبائل فون سے ہو سکتی ہیں۔ لیکن دل چسپ بات یہ ہے کہ اس بڑے آئی فون کا استعمال کرتے ہوئے سیلفیز پر کلک کرنے کے لیے بندے کو اچھلنا پڑے گا۔
ویڈیو کے بارے میں بیم نے لکھا کہ انھوں نے پہلے کبھی ایسی کوئی چیز نہیں بنائی تھی اس لیے یہ بہت مشکل کام تھا، آئی فون تیار ہونے کے بعد ہم اسے اٹھا کر نیویارک سٹی لے گئے تاکہ ٹائمز اسکوائر پر لوگوں کا رد عمل جان سکیں، ہم نے ٹیکنالوجی کے ایک بڑے مبصر مارکیز براؤنلی کو بھی حیران کر دیا۔
بیم کا کہنا تھا کہ یہ ویڈیو بناتے ہوئے انھوں نے بہت ساری مشکلات کا سامنا کیا، لیکن تمام مشکلات کا حل آخر کار نکالا گیا، ہم ورلڈ ریکارڈ توڑنا چاہتے تھے، یہ انتہائی پاگل پن تھا لیکن ہم نے اسے ہنستے گاتے بنایا۔
