لاہور : محکمہ اینٹی کرپشن پنجاب نے زرتاج گل کو19اپریل کی صبح 10بجے دوبارہ طلب کرلیا، سابق خاتون رکن اسمبلی پر منصوبوں کے ٹھیکوں میں رشوت خوری کا الزام ہے۔
تفصیلات کے مطابق اینٹی کرپشن پنجاب نے سابق وفاقی وزیر اور پی ٹی آئی رہنما زرتاج گل کو 19اپریل کو صبح 10بجے دوبارہ طلب کرلیا۔ اس سے قبل انہیں 10اپریل کو طلب کیا تھا مگر وہ پیش نہیں ہوئیں۔
تحریک انصاف کی خاتون رہنما زرتاج گل پر مختلف منصوبوں کے ٹھیکے اپنے فرنٹ مینوں کو مارکیٹ سے کم ریٹ پر دینےکا الزام ہے۔
زرتاج گل اور ان کے خاوند ہمایوں رضا اخوند پر پبلک ہیلتھ انجینئرنگ کے منصوبوں کو ریوائز کروانے کا بھی الزام ہے زرتاج گل اور ان کے خاوند نے منصوبوں کو ریوائزکروا کر سرکاری خزانے کو کروڑوں کا ٹیکہ لگایا۔
ذرائع کے مطابق زرتاج گل نے تمام منصوبوں کے ٹھیکے اپنے فرنٹ مینوں کو دے کر بھاری رشوت وصول کی۔
ان پر الزام ہے کہ انہوں نے منظورشدہ منصوبوں کے پلان میں ازخود تبدیلی کروا کے اپنے گھر اور سیکرٹریٹ کو پختہ سڑک سے منسلک کروایا۔ زرتاج گل نے پبلک ہیلتھ انجینئرنگ کے منصوبوں میں ناقص میٹریل استعمال کرایا جس کی وجہ سے کام مکمل ہونے سے پہلے ہی گلیاں ٹوٹ پھوٹ کا شکار ہوگئیں۔
