اسلام آباد: وزیراعظم نواز شریف افغانستان کے ایک روزہ دورے پر کابل روانہ ہوگئے، آرمی چیف جنرل راحیل شریف ،مشیر خارجہ سرتاج عزیز ،طارق فاطمی اور سیکرٹری خارجہ اعزاز احمد بھی وزیرِاعظم کے ہمراہ ہیں۔
وزیراعظم نواز شریف کو افغان کے صدر اشرف غنی نے افغانستان کے دورے کی دعوت دی تھی، دورے کے دوران وزیراعظم نواز شریف کی قیادت میں وفد افغان صدر سمیت دیگر حکام سے ملاقاتیں کرے گا جن میں دہشت گردی کے خاتمہ سمیت دیگر باہمی امور پر تبادلہ خیال کیا جائے گا۔
دفتر خارجہ کے مطابق افغانستان کیساتھ قریبی روابط ، وزیرِاعظم کے وژن اور خارجہ پالیسی کا اہم حصہ ہیں ۔
پاکستانی قیادت افغان حکام کو بھارتی خفیہ ایجنسی را کے افغانستان کے راستے پاکستان میں دہشت گرد داخل کرنے اور شر انگیز کارروائیاں کروانے کے متعلق بھی تفصیلات سے آگاہ کریں گے۔
واضح رہے کہ وزیراعظم نواز شریف کا اپنے دور حکومت میں یہ دوسرا دورہ افغانستان ہے، اس سے قبل انہوں نے تیس نومبرکو افغانستان کا دورہ کیا تھا۔
