کراچی: فیصل آباد ایئر پورٹ پر کریش لینڈنگ کی صورت حال سے نمٹنے کی مشق کی گئی۔
تفصیلات کے مطابق سی اے اے کی جانب سے فیصل آباد انٹرنیشنل ایئر پورٹ پر کسی بھی ہنگامی صورت حال سے نمٹنے کے لیے فل اسکیل مشق کا انعقاد کیا گیا۔
مشق میں ایئر پورٹ سیکیورٹی فورس (اے ایس ایف) سمیت ریسکیو ادارے 1122 نے بھی حصہ لیا۔
مشق کے دوران کریش لینڈنگ کی صورت میں طیارے میں پھنسے ہوئے مسافروں کو باہر نکالنے، فوری طبی امداد دینے اور اسپتال منتقل کرنے کا عملی مظاہرہ پیش کیا گیا۔
ایئر پورٹ منیجر انور ضیا کا کہنا تھا کہ عالمی ہوا بازی کے قوانین کے مطابق فیصل آباد ایئر پورٹ پر ہنگامی مشقوں سے سی اے اے اور متعلقہ اداروں کے معیار کو مؤثر بنانا ہے۔
