ریاض: 3 لاکھ ریال کے ٹائٹل کے لیے سعودی عرب میں شطرنج مقابلہ سج گیا۔

عرب نیوز کےمطابق سعودی دارلحکومت ریاض میں شطرنج کے مقابلے کا میلہ سج گیا ہے جو دو دن تک جاری رہے گا، اس ایونٹ میں عرب ممالک کے 100 سے زائد کھلاڑی شرکت کر رہے ہیں۔

شطرنج کا یہ مقابلہ جنرل انٹرٹینمنٹ اتھارٹی اور سعودی شطرنج فیڈریشن کے تعاون سے منعقد کیا گیا ہے، ایونٹ میں خواتین کھلاڑی بھی حصہ لے رہی ہیں۔

سعودی چیس فیڈریشن کے صدر ڈاکٹر عبداللہ الوحشی نے گزشتہ روز موریطانیہ کے عالمی سطح کے کھلاڑی مولائے براہیم ہیمام کو پہلی چال چلا کر چیمپئن شپ کا افتتاح کیا۔

ایونٹ کا ٹائٹل جیتنے والے کھلاڑی کو 3 لاکھ، دوسرے نمبر پر آنے والے کو 2 لاکھ اور تیسری پوزیشن لینے والے کو ایک لاکھ ریال کا انعام دیا جائے گا۔

اس مقابلے میں سوئس چیس سسٹم کو اپنایا گیا ہے، اور شرکا 9 راؤنڈ میں مقابلہ کریں گے۔ انعامات کا سلسلہ دس نمبر تک آنے والے کھلاڑیوں تک وسیع ہوگا۔