اسلام آباد: دو روز قبل پولیس مقابلے میں ڈاکوؤں سے ضبط شدہ اسلحہ خاتون سینیٹر نزہت صادق کے گھر کا نکلا ہے۔
تفصیلات کے مطابق دو روز قبل اسلام آباد پولیس اور ڈاکوؤں کے درمیان فائرنگ کے تبادلے کے معاملے کی تفتیش میں اہم انکشافات ہوئے ہیں، مقابلے کے دوران ڈاکوؤں کی جانب سے استعمال کیے جانے والے اسلحے کی شناخت کر لی گئی۔
مقابلے کے بعد ڈاکؤوں کے پاس سے ملنے والا اسلحہ پاکستان مسلم لیگ ن کی سینیٹر نزہت صادق کے گھر میں ڈکیتی کے دوران چھینا گیا تھا جو لائسنس یافتہ تھا۔
رپورٹس کے مطابق سینیٹر نزہت صادق کے گھر ڈکیتی میں بلال ثابت گینگ ملوث تھا، اس ڈکیتی کے دوران چھینے گئے اسلحے سے ڈاکوؤں نے پولیس پارٹی پر فائرنگ کی تھی، جس سے اے ٹی ایس کے 3 اہل کار زخمی ہو گئے تھے۔
اسلام آباد میں پولیس مقابلہ ، 2 ڈاکو ہلاک، 3 اہلکار زخمی
پولیس کے ساتھ فائرنگ کے تبادلے کے دوران پشاور کے 2 ڈاکو واجد اور ارشد عرف خٹکے ہلاک ہوئے، جن کا تعلق بلال ثابت گینگ سے تھا۔
حکام کے مطابق بلال ثابت کی گرفتاری کے لیے اسلام آباد پولیس کی ٹیمیں مسلسل مصروف عمل ہیں، گینگ کے سرغنہ اور ساتھیوں کی گرفتاری کی صورت میں مزید اہم انکشافات متوقع ہیں۔
