معروف بھارتی کامیڈین کپل شرما کا کہنا ہے کہ شو کرنے سے قبل بعض دفعہ انہیں کچھ لفظوں کے استعمال سے منع کیا جاتا ہے۔
بالی وڈ اداکار اور کامیڈین کپل شرما نے کہا ہے کہ حال ہی میں ایک چینل پر پروگرام سے قبل انتظامیہ نے انہیں لفظ پاگل استعمال کرنے سے منع کیا تھا۔
کپل شرما واٹ ویمن وانٹ ودھ کرینہ کپور میں مہمان بنے جہاں انہوں نے اپنی فلم زویگاڈو سے متعلق اور دوسرے سوالات کے دلچسپ جواب دیے۔
طنز و مزاح کے حوالے سے پوچھے گئے سوال پر ان کا کہنا تھا کہ کامیڈینز کو کچھ معاملات میں محتاط رہنا پڑتا ہے۔
جب ان سے کرینہ کپور نے پوچھا کہ 10 سال قبل لوگ جس مذاق سے محظوظ ہوتے تھے اب اس پر غصہ کر جاتے ہیں، اس لیے پروگرام کی تیاری کرتے وقت کن باتوں کو مدنظر رکھتے ہیں؟
اس پر کپل شرما نے بتایا کہ جب میں امرتسر سے شوبز میں آیا اس وقت پنجاب میں مذاق اس حد تک عام تھا کہ شادیوں کے موقع پر لڑکی والے دولہے کو مختلف ناموں سے پکار کر چھیڑتے تھے جبکہ جسمانی خدوخال پر بھی جملے کسے جاتے تھے جو کہ وہاں کی ثقافت میں شامل تھا مگر اب یہ باتیں ’باڈی شیمنگ‘ بن گئی ہیں۔
ان کا کہنا تھا کہ جب چینلز کے لیے پروگرام کرتے ہیں تو ان کی جانب سے آپ کو کچھ الفاظ نہ بولنے کی ہدایات دی جاتی ہیں، حالیہ دنوں میں ہی ایک چینل کی جانب سے مجھے کہا گیا کہ آپ لفظ پاگل استعمال نہیں کر سکتے۔
انہوں نے بات جاری رکھتے ہوئے کہا کہ مجھے اس کی وجہ سمجھ نہیں آئی اور میں نے پوچھا کیوں، جس پر بتایا گیا کہ دراصل اس پر لوگ برا مان جاتے ہیں۔
کپل شرما نے لفظ پاگل کے حوالے سے کہا کہ یہ ایک ایسا لفظ ہے جسے ہم عام طور پر اپنے بچوں اور بہن بھائیوں کے لیے بھی استعمال کرتے ہیں۔
