کراچی: شہر قائد کے علاقے سائٹ ایریا حبیب بینک چورنگی سے شیرشاہ جاتے ہوئے مسافر بس شہریوں پر چڑھ دوڑی جس کے نتیجے میں 2 افراد جاں بحق ہوگئے۔
تفصیلات کے مطابق کراچی کے علاقے سائٹ ایریا میں نادرا آفس کے قریب بس شہریوں پر چڑھ دوڑٰ جس کے نتیجے میں بس ڈرائیور سمیت 2 افراد جاں بحق اور 8 زخمی ہوگئے۔
پولیس کے مطابق حادثہ بریک فیل ہونے کی وجہ سے پیش آیا، حادثے میں زخمی ہونے والے افراد کو عباسی شہید اسپتال منتقل کردیا گیا ہے۔
مزید پڑھیں: کراچی میں اسٹریٹ کرائمز کے ساتھ ٹریفک حادثات بھی بڑھ گئے، 3 جاں بحق
پولیس کا کہنا ہے کہ جاں بحق افراد میں ایک بس کا ڈرائیور اور دوسرا عام شہری ہے جو حادثے کے مقام پر کھڑا تھا۔
واضح رہے کہ کراچی میں حادثات روز کا معمول بن چکے ہیں کبھی بس کی حالت زار اور کبھی ٹوٹی پھوٹی سڑکوں کی وجہ سے شہری اپنی قیمتی جانوں سے ہاتھ دھو بیٹھتے ہیں۔
یاد رہے کہ کچھ عرصہ قبل یونیورسٹی روڈ پر بسوں نے ریس لگاتے ہوئے طالبات کو روند ڈالا تھا جس کے نتیجے میں تینوں طالبات موقع پر ہی جاں بحق ہوگئی تھیں۔
