کراچی: گورنر پنجاب سردار سلیم حیدر نے کہا ہے کہ پنجاب میں کسانوں کے ساتھ بہت زیادتی ہوئی ہے، جب ہمارا کسان رُل گیا ہے، ایسے وقت میں آٹا سستا ہونے کا کریڈٹ لیا جا رہا ہے۔
گورنر پنجاب سردار سلیم حیدر نے کراچی دورے کے موقع پر اے آر وائی نیوز کو خصوصی انٹرویو دیتے ہوئے کہا پچھلی حکومت نے پنجاب میں بلدیاتی انتخابات نہیں کروائے، یہ صوبے پر بڑا ظلم تھا، پچھلی حکومت نے پنجاب میں سب سے نالائق شخص کو صوبے کا وزیر اعلیٰ لگایا۔
انھوں نے گندم اسکینڈل کے حوالے سے بات کرتے ہوئے کہا کسانوں سے گندم کی خریداری صحیح وقت پر شروع نہیں کی جا سکی ہے، یہ نا اہلی ہے، کرپشن ہے یا کچھ اور یہ وقت ثابت کرے گا۔ سلیم حیدر نے کہا جب نظر آ رہا تھا کہ اس مرتبہ گندم کی پیداوار وافر مقدار میں ہونی ہے، تو ایسے میں گندم امپورٹ کرنا مناسب عمل نہیں تھا۔
گورنر پنجاب نے کہا کہ گندم اسکینڈل پر شفاف تحقیقات ہونی چاہیے اور جو جو اس کے ذمہ داران ہیں ان کو سخت سزا ملنی چاہیے۔
انھوں نے کہا بلاول بھٹو کی بات درست ہے کہ کمیٹی پر کمیٹی، پھر سب کمیٹی، یہ کمیٹی کمیٹی کا کھیل اسی طرح چلتا رہے گا، موجودہ صورت حال میں ملک کو ترقی کی جانب لے جانا ہے تو سزا و جزا کا عمل تیز کرنا ہوگا۔
سردار سلیم حیدر نے کہا یہ پنجاب کی بدقسمتی ہے کہ پی ٹی آئی دور میں اس صوبے پر ایسا شخص مسلط کیا گیا جو منصب کے قابل نہ تھا ، ہم نے پنجاب میں پیپلز پارٹی کو مضبوط کرنا اور بلاول کو وزیر اعظم بنوانا ہے، پیپلز پارٹی پنجاب میں بہتر ہو رہی ہے اور اس کے لیے ہم دن رات جدوجہد کریں گے۔
