ریاض: سعودی عرب، سعودی وژن 2030 کے تحت بحیرہ احمر میں بہت بڑا سیاحتی منصوبہ شروع کر رہا ہے، منصوبے کا آغاز سعودی عرب کے مغربی ساحل پر کیا جا رہا ہے۔
سعودی ویب سائٹ کے مطابق سعودی عرب بحیرہ احمر میں بہت بڑا سیاحتی منصوبہ شروع کر رہا ہے اور اسے کچرا فری بنانے کے لیے طے شدہ اسکیموں پر عمل درآمد تیز کردیا گیا ہے۔
بحیرہ احمر ڈیویلپمنٹ کمپنی کا کہنا ہے کہ سعودی وژن 2030 کے تحت اس نے افیردا انٹرنیشنل کمپنی اور سعودی بحری کمپنی کو بحیرہ احمر سیاحتی منصوبے کو ٹھوس کچرے سے صاف رکھنے کا ٹھیکہ دیا ہے۔
بحیرہ احمر کے سیاحتی منصوبے کا آغاز سعودی عرب کے مغربی ساحل پر کیا جا رہا ہے۔
بحیرہ احمر ڈیویلپمنٹ کمپنی کے مطابق سیاحتی منصوبے میں تعمیر ہونے والے مکانات، عمارتوں اور دفاتر سے نکلنے والے کچرے کی ری سائیکلنگ کی جائے گی اور سیاحتی منصوبے کے تحت تمام ہوٹلوں اور تفریحی مقامات میں کچرا فری اسکیم نافذ ہوگی۔
دونوں کمپنیاں ٹینکرز کے ذریعے سیوریج ینبع میں منتقل کریں گی جہاں اسے صاف کر کے استعمال کے قابل بنانے کا پلانٹ قائم ہے۔
بحیرہ احمر سیاحتی منصوبے میں کچرے کو کھاد میں تبدیل کیا جائے گا جسے سیاحتی منصوبے کے تحت پارکوں، سبزہ زاروں اور درختوں کی پیداوار بڑھانے میں استعمال کیا جائے گا۔
