دانتوں کی صفائی صحت اور خوبصورت مسکراہٹ دونوں کیلئے بے حد ضروری ہے، ویسے تو ہم بچپن سے ہی دانتوں کو صاف رکھنے کیلئے برش کا استعمال کرتے ہیں لیکن برش کو استعمال کرنے صحیح طریقہ کیا ہے اس کا شاید سب کو علم نہیں۔
محققین کے مطابق 10 میں سے صرف ایک شخص دانتوں کی صفائی کے بہترین طریقے کو اپناتا ہے اور لوگ برش کرنے کے صحیح طریقے سے لاعلم ہیں۔
اس حوالے سے اے آر وائی نیوز کے پروگرام باخبر سویرا میں معروف ڈینٹسٹ ڈاکٹر مدثر حسین نے دانتوں کی صحت اور اس کی دیکھ بھال سے متعلق ناظرین کو مفید مشورے دیئے۔
انہوں نے بتایا کہ دانت برش کرتے وقت اس بات کا خیال رکھنا ضروری ہے کہ دانتوں کی صفائی کے لیے استعمال کیا جانے والا برش زیادہ پرانا نہ ہو اور ہر 3 ماہ بعد برش تبدیل کرلیا جائے۔
اس کے علاوہ دانت صاف کرتے ہوئے برش کو اوپر نیچے رگڑنے کے بجائے 45 ڈگری کے زاویے میں سیدھا کیا جائے اور دانتوں کے تمام حصوں پر برش کیا جائے اس طرح دانتوں میں موجود بیکٹیریا کو ختم کرنے میں مدد ملتی ہے۔
ڈاکٹر مدثر حسین نے بتایا کہ برش کرتے ہوئے دانتوں کے درمیان جو خلا ہے اسے لازمی صاف کریں کیونکہ کھانے کے اجزاء ان کے درمیان پھنسے ہوتے ہیں جنہیں صاف کرنا بے حد ضروری ہے۔
