اقوام متحدہ کی جنرل اسمبلی نے ڈرون حملوں کے خلاف قرارداد متفقہ طور پر منظور کر لی ہے، قرارداد میں مطالبہ کیا گیا ہے کہ ڈرون حملوں کے استعمال کو بین الاقوامی قوانین کے مطابق بنایا جائے پہلی مرتبہ اقوام متحدہ میں ڈرون حملوں کے خلاف قرارداد پیش کی گئی ہے جسے متفقہ طور پر منظور کرلیا گیا ہے۔
دفتر خارجہ سے جاری بیان کے مطابق پاکستان نے ہم خیال ممالک کے ساتھ مل کر یہ قرارداد اقوام متحدہ کی جنرل اسمبلی میں پیش کی، قرارداد میں ممبر ممالک سے کہا گیا ہے کہ وہ اس بات کو یقینی بنائیں کہ انسداد دہشتگردی کے لیے استعمال کیے جانے والے ڈرونز بین الالقوامی قوانین، اقوام متحدہ کے چارٹر اور بین الاقوامی انسانی حقوق کے مطابق ہوں۔
قرارداد میں اس بات پر زور دیا گیا ہے کہ ڈرون حملوں کی قانونی حیثیت پر مختلف ممالک کے مابین معاہدے کیے جائیں، وزارت خارجہ کے مطابق اگلے برس مارچ میں اقوام متحدہ کی انسانی حقوق کونسل میں بحی ڈرون حملوں کا معاملہ اٹھایا جائے گا۔
