اسلام آباد: وفاقی وزیرِداخلہ چوہدری نثارکا کہناہے کہ دارالحکومت میں بلدیاتی انتخابات پراپوزیشن جماعتوں کی تمام سفارشات منظورہیں اورانتخابات جماعتی بنیادوں پرہی ہوں گے۔
قومی اسمبلی میں بلدیاتی انتخابات کا بل 2015متفقہ رائے سے منظور کرلیا گیاہے جس کے مطابق دارالحکومت میں انتخابات جماعتی بنیادوں پر ہوں گے۔
قومی اسمبلی میں اظہار خیال کرتے ہوئے چوہدری نثار نے کہا کہ یہ نہیں ہوسکتا کہ اسلام آباد میں بلدیاتی انتخابات کا ڈھانچہ موجود نہ ہو، دارالحکومت میں بلدیاتی انتخابات جماعتی بنیادوں پرہوں گے اوربل پرسینٹ میں اپوزیشن کی تمام سفارشات منظور ہیں۔
چوہدری نثارکا کہناتھا کہ بلدیاتی انتخابات ملک کی ضرورت ہیں اوردارالحکومت میں بلدیاتی انتخابات کا انعقاد تمام سیاسی جماعتوں کی بڑی کامیابی ہے۔
انہوں نے کہا کہ پاکستان مسلم لیگ ن چار مرتبہ اقتدار میں آئی ہے اورچاروں مرتبہ بلدیاتی انتخابات ہوئے ہیں اوردارالحکومت میں بلدیاتی انتخابات کا انعقاد پہلی مرتبہ ہونے جارہاہے۔
قومی اسمبلی میں منظور کیے جانے والے بل کے مطابق یوتھ کی سیٹ کیلئے 25 سال سےکم عمر انتخاب میں حصہ لینے کا اہل نہیں ہو گا۔
