کراچی: این اے دو سو چھیالیس میں انتخابی ہل چل تیز ہوگئی ہے، ایم کیوایم آج عوامی قوت کا مظاہرہ کریگی، رینجرز حکام نےایم کیو ایم سے جلسے کا اجازت نامہ طلب کرلیا ہے جبکہ کپتان کھلاڑیوں کا جوش و خروش بڑھانے آج کراچی پہنچیں گے۔
این اے دو سو چھیالیس کا ضمنی الیکشن میں ایم کیو ایم، تحریک انصاف اور جماعت اسلامی آمنےسامنے ہیں، گرما گرم محاذ پرجیت کے لئے تینوں جماعتیں کوشاں ہیں۔ حلقےکے ووٹرز کو راغب کرنے کیلئے سیاسی جماعتوں کی الیکشن مہم عروج پر ہے۔
ایم کیو ایم آج لیاقت آباد میں سیاسی قوت کا مظاہرہ کرے گی، متحدہ نے جلسے کیلئے لیاقت آباد فلائی اوور کے پاس پنڈال سجالیا ہے، جلسے کے باعث فلائی اوور ٹریفک کیلئے بند کردیا گیا ہے۔
جلسے سے ایم کیوایم کےقائد الطاف حسین کا خطاب بھی متوقع ہے۔
دوسری جانب پی ٹی آئی کا سونامی کل عائشہ منزل کا رخ کرے گا، کھلاڑیوں کے جوش و خروش میں اضافے کیلئے کپتان آج پھر کراچی آرہے ہیں۔
