بھارتی سفارت کار دیویانی کھوبراگڑے کو امریکا نے سفارتی استثنی دے دیا جس کے بعد وہ امریکا چھوڑ کر چلی گئیں، دیویانی کو ویزا فراڈ اور ملازمہ کو انہتائی کم اجرت دینے پر مقدمے کا سامنا تھا۔
بھارت اور امریکا کے بیچ جاری سفارتی کشیدگی کا بلآخر اس وقت خاتمہ ہوگیا جب امریکا نے بھارت کے آگے گھٹنے ٹیکتے ہوئے ویزا فراڈ اور گھریلو ملازمہ کو انتہائی کم اجرت دینے والی بھارتی سفارتکار دیویانی کھوبراگڑے کو سفارتی استثنی دے دیا اور وہ امریکا چھوڑ کر چلی گئیں۔
تاہم امریکی عدالت نے دیویانی پر فرد جرم عائد کردی ہے، کھوبراگڑے پرعائد فرد جرم اس وقت تک رہے گی جب تک وہ عدالت میں پیش نہیں ہوتیں یا پھر ان کو حاصل استثنی ختم نہیں ہوتا اور وہ بغیر سفارتی استثنی امریکا واپس نہیں آتیں۔
بھارتی سفارت کار دیویانی كھوبرا گڑے کو ان کی نوکرانی سنگیتا رچرڈز کی طرف سے شکایت پر گرفتار کیا گیا تھا، بھارت نے سفارت کار کی گرفتاری کے بعد امریکا سے معافی مانگنے کا مطالبہ کیا تھا اور امریکا پر دباؤ ڈالنے کے لئے متعدد احتجاجی اقدامات کئے تھے۔
