راولا کوٹ : لائن آف کنٹرول پر بھارتی فوج کی بلااشتعال فائرنگ کے نتیجے میں ساٹھ سالہ شہری شہید ہوگیا، پاک فوج کی جانب سے بھرپور جواب پر بھارتی توپیں خاموش ہوگئیں۔
آزاد کشمیر کے ضلع راولاکوٹ میں لائن آف کنٹرول پر بھارتی فوج کی بلااشتعال فائرنگ سے ساٹھ سالہ شہری محمد اسلم شہید ہوگیا، آئی ایس پی آر کے مطابق پاکستانی شہری پر اس وقت فائرنگ کی گئی جب وہ گھاس کاٹ رہا تھا، محمد اسلم کو تین گولیاں لگیں۔
پاک فوج کی جانب سے بھارتی فوج کو بھرپور جواب دے کر بھارتی توپوں کو خاموش کرادیا گیا۔
ڈی جی آئی ایس پی آر میجر جنرل عاصم سلیم باجوہ نے دو روز قبل خبردار کیا تھا کہ بھارت لائن آف کنٹرول پر خطرناک گیم کھیل رہا ہے، جس کا انجام اچھا نہیں ہوگا۔
بھارتی وزیرِ اعظم نریندرمودی نے کرکٹ ڈپلومیسی کا سہارا لیتے ہوئے وزیرِاعظم نوازشریف کو فون کر کے مذاکرات کا سلسلہ بحال کرنے کا عندیہ بھی دیا تھا، لیکن بھارت کی جانب سے لائن آف کنٹرول پر سنگین خلاف ورزیوں کا سلسلہ بھی جاری ہے۔
