اسلام آباد: حکومت اور تحریکِ انصاف کے درمیان مذاکرات کا سلسلہ آج سے دوبارہ شروع ہو رہا ہے، فریقین کے درمیان عدالتی کمیشن کے قیام اور طریقہ کار سے متعلق بات چیت ہوگی۔
تحریکِ انصاف اور حکومت کے درمیان رابطے تیز ہوگئے ہیں، حکومت اور پاکستان تحریکِ انصاف کے درمیان دھرنا ختم ہونے کے بعد پہلا با ضابطہ رابطہ ہوگیا، ترجمان تحریکِ انصاف شیریں مزاری کے مطابق حکومتی کمیٹی کے سربراہ اسحاق ڈار نے شاہ محمود قریشی کو ٹیلی فون کیا اور مذاکرات کا سلسلہ آگے بڑھانے پر بات چیت کی۔
جس کے بعد دونوں فریقین کے درمیان مذاکرات کا دوسرا دور آج سے شروع کرنے پر اتفاق ہوگیا ہے۔
مذاکرات آج سہ پہر چار بجے جہانگیر ترین کی رہائش گاہ پر ہوں گے، جس میں عدالتی کمیشن کے قیام اور طریقہ کار سے متعلق نکات کو حتمی شکل دی جائے، مذاکرات میں حکومت کی جانب سے اسحق ڈار اور احسن اقبال شرکت کریں گے۔
تحریکِ انصاف کی جانب سے شاہ محمود قریشی، اسد عمر اور جہانگیر ترین مذاکرات میں شریک ہوں گے۔
