دبئی: قومی ٹیم کے وکٹ کیپر بیٹسمین سرفراز احمد نے پہلے ٹی ٹوئنٹی میں ذمہ دارنہ بیٹنگ کرتے ہوئے پاکستان کی کامیابی میں اہم کردار ادا کیا۔
قومی ٹیم کے وکٹ کیپر بیٹسمین سرفراز احمد نے ٹیسٹ سیریز میں لگنے والی فارم کا بھرپور فائدہ اٹھاتے ہوئے ٹی ٹوئنٹی میں بھی خوب رن بنائے۔ ان کا بیٹ ٹیسٹ کرکٹ کی مشکل پوزیشن میں بھی چلا اور ٹی ٹوئنٹی کی تیز فارمیٹ میں بھی۔ سرفراز نے دھواں دھار شاٹ بھی لگائے اور سنگل ڈبل بھی بنائے۔
نیوزی لینڈ کے خلاف پہلے ٹی ٹوئنٹی میں سرفراز نے آٹھ چوکوں اور دو چھکوں کی مدد سے کیرئیر بیسٹ چھیتر رنز اسکور کئے، جس کے بعد وہ ٹی ٹوئنٹی فارمیٹ میں سب سے بڑی انفرادی اننگز کھیلنے والے پاکستانی وکٹ کیپر بن گئے اس سے قبل کامران اکمل تیہتر رنز کے ساتھ پہلے نمبر پر موجود تھے۔
