کراچی : سندھ اسمبلی میں مکان اور جائیداد کرائے پر دینے کا بل منظورکر لیا گیا ہے۔
بل کے مطابق کرائے دار سے متعلق پولیس کو تین گھنٹے میں اطلاع دینا لازمی قرار دیا ہے، خلاف ورزی پر چھ ماہ قید اور پینتالیس ہزار روپے جرمانہ ہوگا، مکانات کرائے پر دینے اور کرائے پر لینے والوں کے لیے بھی قانون آگیا۔
ہوٹل اور گیسٹ ہاوٴس مالکان بھی مہمانوں اورکرائے داروں کی اطلاع تین گھنٹے میں پولیس کوفراہم کریں گے، کرائے داری قانون کے تحت پولیس کو اطلاع نہ دینے والے کے خلاف قانون حرکت میں آئے گا۔ اطلاع نہ دینے والے مالک کوچھ ماہ قید اورپینتالیس ہزارروپے جرمانے کا سامانا کرنا پڑے گا۔
صوبائی وزیرِ پارلیمانی امور ڈاکٹر سکندر میندھرو کا کہنا ہے کہ بل جرائم پیشہ عناصر اور دہشت گردوں کے خلاف قومی ایکشن پلان کا حصہ ہے۔
ایم کیو ایم اور فنکشنل لیگ نے جائیداد کرائے پر دینے کے بل میں کئی ترامیم پیش کیں، جو مسترد کردی گئیں۔
سید سردار احمد کا کہنا تھا کہ پولیس کو اطلاع دینے کا ٹائم فریم تین گھنٹے کی بجائے چوبیس گھنٹے ہونا چاہیے، لامحدود اختیارات پولیس کودینے سے صوبہ پولیس اسٹیٹ بن جائے گا۔
قائد حزبِ اختلاف شہریارمہر نے ٹائم فریم تین گھنٹے میں توسیع کے لیے ترمیم پیش کی، جو مسترد کردی گئیں اور بل کثرت رائے سے منظور کرلیا گیا ہے۔
