لاہور : علامہ اقبال انٹرنیشنل ائیرپورٹ پر ایک ماہ کے دوران کسٹم اہلکاروں نے تین کارروائیاں کرکے نو کروڑ روپے مالیت کے ہیرے ، سونا اور کرنسی پکڑلی۔
واردات میں ملوّث چار ملزمان کو گرفتار کر لیا گیا، یہ بات کلکٹر کسٹم لاہور مکرم جاہ نے لاہور میں پریس کانفرنس کرتے ہوئے بتائی۔
انہوں نے کہا کہ حکومت پاکستان کی ہدایت پر ایف بی آر ائیرپورٹس پر پچانوے فیصد مسافروں کو گرین چینل کی سہولت دے رہی ہے لیکن کچھ جرائم پیشہ افراد اس سہولت کا ناجائز فائدہ اٹھا رہے ہیں ۔
انہی افراد سے کسٹم نے ایک ماہ کے دوران نو کروڑ مالیت کے پندرہ قیمتی ہیرے ، بتیس کلو سونااور ملکی و غیر ملکی کرنسی برآمد کی اور چار افراد کو حراست میں لیا۔
ان کا کہنا تھا کہ اس سلسلے میں تین رکنی کسٹم تحقیقاتی ٹیم بنا دی گئی ہے جو اسمگلنگ میں ملوث اصل مجرموں پر پہنچنے کی کوشش کررہی ہے۔
