ریاض: سعودی عرب میں ایک پاکستانی شہری کا منشیات کی اسمگلنگ کے جرم میں سر قلم کردیا گیا ہے۔
سرکاری نیوز ایجنسی ایس پی اے نے وزارتِ داخلہ کے حوالے سے بتایا ہے کہ محمد صادق حنیف نامی شخص ہیروئن کی ایک بڑی مقدار اپنے پیٹ میں چھپا کر سعودی عرب لانے کی کوشش کر رہا تھا، جس دوران اسے گرفتار کیا گیا تھا، بدھ کے روز مشرقی قصبے خوبر میں دی جانے والی اس سزائے موت کے بعد سلطنت میں رواں سال دی جانے والی سزائے موت کی تعداد 63 ہوگئی ہے۔
اس سے قبل اکتوبر میں بھی چار پاکستانیوں کو منشیات اسمگلنگ کے جرم میں سزائے موت دی جا چکی ہے، اقوامِ متحدہ نے سعودی عرب میں سزائے موت کی بڑھتی ہوئی شرح پر تشویش کا اظہار کرتے ہوئے مطالبہ کیا ہے کہ ان سزاؤں پر عملدرآمد فوراً روک دیا جائے۔
اقوام متحدہ کے خصوصی نمائندے کرسٹوف ہائنز کے مطابق سعودی عرب میں ہونے والے ٹرائلز میں شفافیت موجود نہیں ہوتی، جب کہ ملزمان کو وکیل کی خدمات بھی حاصل نہیں ہوتیں۔
